FOTO/ Ministrja Anila Denaj pret të ngarkuarin me punë në ambasadën e SHBA-së

Ministrja e Bujqësisë dhe Zhvillimit Rural, Anila Denaj priti sot në një takim Të Ngarkuarin me Punë në Ambasadën e Shteteve të Bashkuara të Amerikës në Tiranë, David Wisner dhe drejtuesen e USAID në Shqipëri, Mischere Kawas.

Denaj bëri të ditur se gjatë takimit u diskutua mbi projektet e USAID-it për forcimin e zinxhirit të vlerës dhe rritjen e bashkëpunimit midis bizneseve shqiptare dhe atyre amerikane.

“Diskutuam mbi projektet e USAID-it për forcimin e zinxhirit të vlerës, mundësitë e bashkëpunimit mes bizneseve shqiptare dhe ato amerikane në fushën e bujqësisë, për shkëmbimin e eksperiencës dhe produkteve në shërbim të rritjes ekonomike të fermerëve”, u shpreh ministrja Denaj.

Bujqësia është një ndër sektorët e rëndësishëm në ekonominë e vendit, e cila kontribuon ndjeshëm në Prodhimin e Brendshëm Bruto dhe punëson rreth 40 % të forcës së përgjithshme të punës.