Fshirja e shqiptarëve të Luginës së Preshevës nga regjistrat, Cakaj: Sulm mbi demokracinë

Shqipëria dënon operacionin serb të “pasivizimit të adresave” dhe dokumenteve të shqiptarëve në Luginën e Preshevës. Ministri në Detyrë për Europën dhe Punët e Jashtme, Gent Cakaj, duke folur pas takimit me përfaqësuesit politik të Luginës së Preshevës ngriti si shqetësim se procesi i nisur fillimisht në Medvegjë është shtrirë dhe në komunën e Bujanocit dhe Preshevës.

”Diskutuam hollësisht për një seri çështjesh në interes të ndërsjelltë. Ndamë pikëpamjen se pasivizimi i adresave konkrete dhe vendbanimeve të përgjithshme në Medvegjë specifikisht nuk është një prirje e izoluar, është duke u shtrirë dhe në komunën e Bujanocit dhe Preshevës.Kjo nuk është vetëm masë përjashtimi politik, por edhe sulm mbi demokracinë. Mbroj fuqimisht të drejtën themelore për përdorim të simboleve dhe gjuhës në atë hapësirë. Njohja e teksteve mësimore në nivelin fillor dhe të mesëm është e domosdoshme dhe nuk do të kursejmë asnjë përkjekje në këtë drejtim. Insistoj edhe njëherë në përfshirjen proporcionale të shqiptarëve në institucionet shtetërore në Republikën e Serbisë në të gjitha nivelet”.

Kryetari i Këshillit Nacional të Shqiptarëve në Luginën e Preshevës, Ragmi Mustafa, kërkoi angazhim diplomatik dhe shtetëror në mbështetje të Luginës. ”Duhet angazhim diplomatik e shtetëror në mbështetje të Luginës së Preshevës. Republika e Shqipërisë do të ndërmarrë një sërë masash për të ridimensionuar Republikën e Shqipërisë në konsumimin e nenit të 8 të Kushtetutës që do të mundësojë gradualisht që shqiptarët e Luginës së Preshevës të jenë nën përkujdesjen institucinale të Republikës së Shqipërisë”.