Fushata në Elbasan, eskalon Alizoti kundër qeverisë: Do ju hamë të gjallë

Tone kërcënuese u lexuan sot në fjalimin që mbajti drejtuesi politik i demokratëve në qarkun e Elbasanit. Tomorr Alizoti iu drejtua qeverisë, duke thënë: ”Ju që doni të shkatërroni Shqipërinë, ju analfabetë, ju maskarenj, do t’ju hamë të gjallë. Mos guxoni t’ju shkoni njerëzve nëpër shtëpi natën! Mos guxoni të fusni duart ditën e zgjedhjeve! Doktor jepi se ty të kanë më shumë frikë”.

Me thirrjen drejtuar Berishës për të trembur më shumë kundërshtarin, Alizoti u duk i vetëdijshëm mbi kapacitetin e vet për të ngjallur frikë në kampin tjetër. Doktori nuk e zhgënjeu dhe gjatë takimit elektoral në Librazhd foli me emra, duke treguar si ishte dhunuar shoferi i Taulant Ballës.

Pas ndalesës në Librazhd, Berisha zhvilloi një takim elektoral edhe në Belsh, nga ku një mesazh pati për administratën. Me premtimin e Shqipërisë madhështore, kreu i PD-së prezantoi programin ekonomik të PD, ku pohoi se brenda 100 ditëve të para qytetarët do të dalin nga varfëria ekstreme.