Gala Dragot dhe Robert Aliaj mesazhe për të rinjtë: Mos lejoni politikën të ndikojë në të ardhmen tuaj

Gala Dragot, këngëtarja e njohur shqiptare që jeton në Belgjikë, nga protesta përballë Kryeminisrrisë, tha se të rinjtë duhet të kenë kurajë dhe s’duhet të lejojnë askënd t’u njollosë të ardhmen.

“Jam kaq e lumtur që jeni të ndërgjegjshëm për të ardhmen që doni. Unë kam qenë në protestën e studentëve kur isha 13 vjeç. Më kujtohet si më mbushi me shpresë. Sot jam këtu për t’ju kujtuar që duhet të keni kurajë pafund! Kurajë pafund që të bëni ndryshim, të rrëzoni këtë klasë politike të kalbur! Mos lejoni këtë klasë të njollosë të ardhmen tuaj! E ardhmja na përket ne dhe çdo qeveri që s’lejon të ndërtojmë të ardhmen tonë, është armiku ynë! Liria nuk dhurohet, liria negociohet dhe duhet të luftosh për ta fituar! Jam e lumtur të them se brezi im do ta shpëtojë këtë vend!”, tha këngëtarja.

Gala shoqërohej nga i ati, artisti Robert Aliaj, i cili mbështeti deklaratën e së bijës. “Një qeveri që s’është në interesat e brezit tuaj, është armiku juaj! Është shumë e vërtetë! Ne s’mund të lejojmë arrogancën sikur ky vend i përket një padroni. Ne s’mund të tolerojmë një lider që flet në emër të çdo ministri të shtetit të vet! Kjo nuk është demokraci!”, tha Aliaj.