”Gazeta Koha Jonë ndryshoi historinë”, kryeministri Rama: Kishte rol kyç në referendumin e 1994

Në emisionin ”KOHA JONË-DEBAT”, kryeministri Edi Rama dhe Nikoll Lesi ndanë kujtime dhe reflektime mbi rolin e medias në vitet e vështira të tranzicionit shqiptar gjatë ditës së 35 vjetorit të themelimit të kësaj gazete legjendë, e cila është e para gazetë e lirë shqiptare. Ajo u themelua nga gazetari Nikoll Lesi. Në historinë e saj 35 vjeçare u tregua gjatës bisedës me kryeministrin disa ngjarje të veçanta nga jeta e kësaj gazete si përplasja me presidentin e kohës (1992-1997) Sali Berisha, ku u arrestuan kryeredaktori dhe zv/kryeredaktori, ku u hodh me tritol në erë shtëpia e botuesit Lesi, dhe ku me 3 mars 1997 u dogj redaksia e gazetës KOHA JONE nga pushteti i kohës. Por edhe përplasjet me kryeministrin e PS, Fatos Nano gjatë viteve 2003-2005, kur kryeministri kërkoi me prokurorinë imunitetin e deputetit botues, Nikoll Lesi për ta arrestuar se gazeta KOHA JONE kishte shkruar kundër Fatos Nanos e familjes së tij për korrupsion. Një pjesë e bisedës me kryeministrin e sotëm, Rama iu kushtua kësaj përplasje të madhe mes Nikoll Lesit dhe kryeministrit socialist.

Gjatë bisedës, Rama theksoi ndikimin që kishte gazeta “Koha Jonë” në informimin e qytetarëve në vitet 1992-2005, duke u ndalur veçanërisht te referendumi i vitit 1994.

“Po e ke menduar ndonjëherë se si do të ishte rrjedha e ngjarjeve po të mos ishte ‘Koha Jonë’? Të ishte vetëm TVSH-ja, RD-ja, ‘Albania’ dhe ‘Sporti Popullor’? Si do ta përjetonin njerëzit realitetin që ishte e kundërta e asaj që thoshte TVSH-ja?”, u shpreh Rama. Sipas kryeministrit, “Koha Jonë” kishte një rol kyç në pasqyrimin e realitetit dhe krijimin e një alternative informative për qytetarët në një periudhë kur mediat ishin të kufizuara dhe të kontrolluara nga pushteti.

Pjesë nga biseda

Kryeministri Edi Rama: Po e ke menduar ndonjëherë për shembull që si do ishte rrjedha e ngjarjeve po mos ishte gazeta Koha jonë? Të ishte vetëm TVSH-ja, RD-ja, “Albania” edhe “Sporti popullor”. Si do ishte rrjedha e ngjarjeve? Si do të ishte Shqipëria sot?

Nikollë Lesi: Sipas avokat Ngjelës po të mos ishte gazeta Koha Jone ndër vitet 1992-1997, Berisha do ta kishte kthyer Shqipërinë në mbreteri dhe nuk PS asnjëherë nuk do të vinte në pushtet. As media të lira nuk do të kishte. Ishte KOHA JONE që i doli përballë regjimit të Berishës së I-rë. Por e pësoi se e dogji pushteti me 3 mars 1997, duke e shkatërruar pothuaj krejtësisht, ndonëse u ngrit prapë nga hiri.

Kryeministri Edi Rama: Unë mendoj për shembull që tek referendumi i vitit 1994 gazeta Koha Jonë ka patur rol kyc. Kishte një TVSH presidencial që nuk jepte fare informacion për opozitën ose kulmi i arritjes për PS-në atëherë ishte kur i nxirrnin ndonjëherë Namikun ose Servetin, ndjesë pastë, pa zë dhe thonin se foli dhe ky se ndërkohë gjithë pjesa tjetër ishte lemeri. Domethënë si do ta përjetonin njerëzit realitetin që ishte e kundërta e asaj që thoshte TVSH-ja po mos ishte Koha Jonë. Ma thuaj!

Nikoll Lesi: Ta thashë pra, mbreteri e Saliut dhe PS-ja nuk vinte kurrë në pushtet. Nuk do të kishte liri fjale dhe media të lira.