Gjashtë aksidente në 12 orë, një humbje jete dhe nëntë të plagosur në rrugët e vendit

Një bilanc i rëndë aksidentesh është regjistruar këtë të hënë, 3 gusht, ku gjashtë përplasje rrugore kanë shkaktuar një viktimë dhe nëntë persona të plagosur brenda 12 orëve. Një nga aksidentet më të rënda ndodhi në aksin Fier-Lushnjë, pranë fshatit Vajkan. Dy automjete u përplasën me njëra-tjetrën dhe përfunduan në kanalin anësor të autostradës. Nga përplasja mbetën të plagosur katër persona, të cilët u dërguan me urgjencë në Spitalin Rajonal të Fierit.

Pak minuta më vonë, një tjetër aksident u regjistrua në autostradën Durrës-Tiranë, pranë Sukthit, në drejtim të kryeqytetit. Në përplasjen zinxhir u përfshinë shtatë automjete. Fatmirësisht, nuk pati persona të lënduar, por vetëm dëme materiale dhe trafik të rënduar për shkak të radhëve të krijuara. Një tjetër ngjarje rrugore ndodhi rreth orës 13:30 në hyrje të Stan-Karbunarës, në aksin e vjetër Lushnjë–Berat. Një 28-vjeçare humbi kontrollin e automjetit, duke u përplasur me barrierat e një ure. Pas disa rrotullimeve, makina përfundoi e përmbysur në mes të rrugës. Drejtuesja u transportua në Spitalin e Lushnjës për trajtim mjekësor.

Në lagjen Sheq i Madh në Fier, një tjetër aksident la të plagosur drejtuesin e një motomjeti, pas përplasjes me një automjet. Bilanci tragjik u shënua në mbrëmje në Ksamil, ku një 20-vjeçar humbi jetën pasi automjeti me të cilin udhëtonte si pasagjer doli nga rruga. Sipas policisë, ngjarja ndodhi rreth orës 18:10 në rrugën e Plazhit, në zonën e Lagunës. Automjeti tip “Benz”, me drejtues një 22-vjeçar, humbi kontrollin dhe doli nga rruga. PasagjeriAntonio Mateli, ndërroi jetë në vendngjarje, ndërsa drejtuesi u dërgua në spital dhe ndodhet jashtë rrezikut për jetën.

Mbrëmja u mbyll me një tjetër aksident në aksin kombëtar Elbasan-Cërrik, ku një automjet dhe një furgon u përplasën. Nga përplasja mbetën të plagosur tre persona. Brenda vetëm pak orësh, rrugët e vendit regjistruan një seri aksidentesh që sollën pasoja të rënda, duke rikthyer edhe një herë shqetësimin për sigurinë rrugore gjatë sezonit veror.