Gjergj Luca një ofertë e freskët në këto ditë të nxehta, 800 euro pagë në Rozafa për studentët e ekselencës

Nga Albert Vataj
“Kam një ofertë të freskët në këto ditë të nxehta. Maturantet apo studentet e Elbasanit që kanë mbaruar shkollën me mesataren 9, u ofroj punë në kompaninë Rozafa, si fillim me 800 euro pagë në muaj…” Me këtë mesazh, të shoqëruar nga një videokomunikim të publikuar në rrjetet sociale, sipërmarrësi Gjergj Luca ka prezantuar një nismë të re, e cila synon të afrojë pranë biznesit të rinjtë më të dalluar të Elbasanit.

Këtë herë, Luca nuk i është drejtuar opinionit publik për çështje politike apo debat publik. Ai ka zgjedhur të flasë vetëm për punën, për mundësitë që biznesi mund t’u ofrojë të rinjve dhe për investimin te kapitali njerëzor, si vlera më e çmuar e çdo sipërmarrjeje që synon të ndërtojë të ardhmen.
Oferta u drejtohet maturantëve dhe studentëve, veçanërisht vajzave, që kanë përfunduar studimet me mesatare mbi 9. Ata do të përfshihen fillimisht në një program tre-mujor formimi profesional, gjatë të cilit do të trajnohen drejtpërdrejt në proceset e prodhimit nga specialistët, drejtuesit dhe punonjësit më të kualifikuar të kompanisë Rozafa. Edhe gjatë kësaj periudhe të formimit, pjesëmarrësit do të përfitojnë një pagesë mujore prej 80 mijë lekësh.

Në përfundim të trajnimit, kandidatët që do të dëshmojnë përkushtim dhe aftësi do të pajisen me kontratë pune dhe një pagë mujore prej 100 mijë lekësh, duke nisur rrugëtimin e tyre profesional si “oficerë të Rozafës”. Më tej, karriera e secilit do të ndërtohet mbi bazën e meritës, performancës dhe zhvillimit profesional, me mundësi reale për t’u ngjitur në strukturat e një prej kompanive më të rëndësishme shqiptare në sektorin e akuakulturës.

Në përmbyllje të këtij komunikimi, Gjergj Luca fton të gjithë të rinjtë që plotësojnë kriteret të mos hezitojnë të bëhen pjesë e këtij projekti, duke kontaktuar në adresën elektronike rozafa.fishcity@gmail.com.
Kjo nismë përfaqëson më shumë sesa një ofertë punësimi. Ajo është një investim i drejtpërdrejtë te brezi i ri, një ftesë për të kaluar nga bankat e shkollës në sfidat e ekonomisë reale, duke krijuar ura të qëndrueshme mes arsimit dhe tregut të punës. Në një kohë kur shumë të rinj kërkojnë mundësi për të ndërtuar të ardhmen e tyre, iniciativa të tilla dëshmojnë se biznesi mund të jetë jo vetëm motor i zhvillimit ekonomik, por edhe një partner i rëndësishëm në formimin e profesionistëve të së nesërmes. Duke mbështetur ekselencën dhe meritën, kjo ofertë synon të shndërrojë potencialin e të rinjve në energji krijuese për zhvillimin e kompanisë dhe të ekonomisë shqiptare në tërësi.