Gjykata e Lartë ka njoftuar nisjen e procedurës për zgjedhjen e kryetarit të ri të institucionit që do të zëvendësojë Sokol Sadushin, pas përfundimit të mandatit të tij trevjeçar.
Procedura është hapur në respektim të afatit 60-ditor, pasi mandati trevjeçar i kryetarit aktual, i zgjedhur më 17 tetor 2023 përfundon më 17 tetor 2026.
Gjyqtarët e Gjykatës së Lartë që plotësojnë kriteret ligjore dhe dëshirojnë të kandidojnë për funksionin e kryetarit kanë afat deri më 11 shtator për të paraqitur shprehjen e interesit, së bashku me dokumentacionin e përcaktuar në rregullat e miratuara nga Këshilli i Lartë Gjyqësor.
Sipas njoftimit, procesi i zgjedhjes do të përfundojë përpara përfundimit të mandatit të kryetarit aktual. Synimi është që Kryetari i ri i Gjykatës së Lartë të nisë ushtrimin e detyrës më 18 tetor 2026, duke garantuar vijimësinë e funksionimit të institucionit.
Kryetari zgjidhet nga mbledhja e përgjithshme e gjyqtarëve të Gjykatës së Lartë, mes anëtarëve të saj dhe me votim të fshehtë.