Gjykata e Shkallës së Parë të Juridiksionit të Përgjithshëm Tiranë ka vendosur lirimin e menjëhershëm të shtetasit me inicialet O. Ç., i arrestuar më 29 tetor 2026 gjatë protestave në Tiranë. Për të janë caktuar dy masa sigurie: “Detyrimi për t’u paraqitur në policinë gjyqësore” dhe ndalimi për t’u larguar nga njësia administrative ku ka vendbanimin pa autorizimin e gjykatës.
Vendimi është marrë më 1 nëntor 2026, pas shqyrtimit të kërkesës së Prokurorisë për vlerësimin e ligjshëm të arrestimit në flagrancë dhe caktimin e masave të sigurimit personal.
O. Ç. dyshohet për veprat penale “Shkatërrimi i pronës” dhe “Organizimi dhe pjesëmarrja në grumbullime e manifestime të paligjshme”, të parashikuara përkatësisht nga nenet 150 dhe 263 të Kodit Penal.
Sipas vendimit, personi nën hetim do të duhet të paraqitet pranë policisë gjyqësore të Prokurorisë së Tiranës të hënën e parë të çdo muaji, në orën 11:00.
Gjithashtu, atij i ndalohet të largohet nga territori i njësisë administrative në Dibër, ku ka vendbanimin, pa marrë më parë autorizimin e gjykatës. Një tjetër kufizim i vendosur është ndalimi i pjesëmarrjes në zonat ku zhvillohen tubime apo protesta.
