Grida Duma takim me gratë e një biznesi fason, “zgjedhjet, shans për të mos humbur”

Kandidatja e Partisë Demokratike për Bashkinë e Durrësit në zgjedhjet lokale të 21 qershorit, Grida Duma, mëngjesin e sotëm e ka nisur me një takim me  gratë dhe vajzat e një prej bizneseve fason në këtë qytet. Ajo u shpreh se Durrësi ka një shans për t’i kthyer shpresën e për të pasur më shumë punë. – “Nuk do t’u them më jepni votën mua sepse atë do e bëni si ta ndjeni vetë. Ajo që unë kam detyrë të them është që kemi një shans. E kemi bashkë këtë shansin sot të bëjmë dy gjëra të mëdha. Ta bëjmë Durrësin siç e meriton një qytet që të sjellë më shumë punë, për fëmijët dhe për vetë ne me një rrogë më dinjitoze. Dhe dua të falënderoj me mirënjohje biznesin që arrin të mbijetojë edhe në kushte të vështira”, – theksoi Grida Duma.  Kandidatja për Durrësin shtoi se qyteti dhe rrethinat e tij në bashkinë e re, kanë një potencial të vërtetë për të dalë nga varfëria. Ajo tha se do të punojë për një model tjetër, më afër qytetarëve dhe biznesit. – “Jetoni në një qytet të mrekullueshëm. Realiteti i një qyteti me port. Realiteti e një qyteti me plazh. Realiteti e një turizmi që mban gjithë turizmin e Shqipërisë përfundon që të jetë më i varfër në përgjithësi se sa mesatarja e Shqipërisë. Kam ardhur me shpirt për ta marrë Bashkinë e Durrësit, për të pasur një model si ne, për të pasur një model me dashuri. Ajo që ju kërkoj është hajdeni me mua në një projekt tjetër, në një tjetër qytet dhe të bëjmë me mirënjohje ndaj këtij biznesi dhe ndaj shumë bizneseve të tjera, një gjë që të nesërmen ta ketë më të mirë”, shtoi më tej Grida Duma. Ajo mori mbështetjen e grave dhe vajzave të pranishme duke shpresuar tek modeli ndryshe i zonjës Duma. – “Shpresa vdes gjithmonë e fundit. Ne shpresojmë dhe kemi besim të plotë tek ju. Dhe shpresojmë që çdo gjë të realizohet. Ne do të jemi gjithmonë pas jush”, tha një punonjëse e biznesit fason në qytetin bregdetar.  Grida Duma kërkon mandatin e saj të parë si kandidate e  djathtë në Bashkinë e Durrësit, për t’i dhënë fund qeverisjes së pushtetit lokal nga e majta dhe Vangjush Dako, i cili kërkon mandatin e tretë.