Grupi i PD-Kuvendit: Deputetit socialist Vullnet Sinaj ti hiqet mandati. Përfitoi miliona lekë nga buxheti i shtetit

Grupi Parlamentar i Partisë Demokratike, do ti kërkojë Kuvendit që të dërgojë në Gjykatën Kushtetuese mandatin e deputetit socialist Vullnet Sinaj. Sipas PD-së, deputeti Sina ka përfituar miliona lekë nga buxheti i shtetit. ”Deputeti Vullnet Sinaj i shpallur si “deputet kampion” nga Edi Rama në Kongresin e fundit të Partisë Socialiste, rezulton se qënka kampion në përfitimin e parave publike në kundërshtim flagrant me Kushtetutën”,-thuhet në qëndrimin e grupit të PD-së.

Njoftimi i PD-së

Grupi Parlamentar i Partisë Demokratike, do ti kërkojë Kuvendit të dërgojë në Gjykatën Kushtetuese mandatin e deputetit socialist Vullnet Sinaj. Nga verifikimi i të dhënave të thesarit të shtetit, rezulton se deputeti Sinaj në kundërshtim flagrant me nenin 70, pika 3 e Kushtetutës, ka përfituar të ardhura nga Buxheti i Shtetit, në vlerë disa milion lekë, përmes 9 kompanive të tij private, gjatë periudhës ku ushtron edhe mandatin e deputetit.

Deputeti Vullnet Sinaj i shpallur si “deputet kampion” nga Edi Rama në Kongresin e fundit të Partisë Socialiste, rezulton se qënka kampion në përfitimin e parave publike në kundërshtim flagrant me Kushtetutën.

Mocioni, së bashku me të gjitha provat që kompanitë e tij kanë përfituar pagesa miliona lekshe, në mënyrë të vijueshme nga Buxheti i Shtetit, është duke u përgatitur dhe do të dorëzohet gjatë kësaj jave zyrtarisht në Kuvend.