Gurët në veshka, shqiptarët pinë pak ujë. 15% e popullsisë ka probleme

Shqiptarët mund të jenë pijedashës, por jo konsumues të mirë të ujit. Problemet me veshkat i kanë të shtuara. 15% e popullsisë në vendin tonë vuan nga gurët në veshka, një sëmundje që nëse nuk trajtohet të çon në dializë. ”Shqiptarët pinë shumë pak ujë në ditë, 600-700 ml ujë në ditë. Për të mos pasur gurë në veshka duhet të pini mbi 2 litra ujë në ditë”.

Shefi i shërbimit të nefrologjisë, Myftar Barbullushi, thotë së sëmundja e gurëve në veshka nuk duhet neglizhuar. “Gurët janë thjesht maja e ajsbergut. Poshtë fshihen sëmundje të ndryshme, si diabeti, sëmundjet e kockave, obeziteti. Përtej gjenetikes, faktori i ushqyerjes është shumë i rëndësishëm”.

Vitet e fundit mjekët po përballen me rritje të pacientëve që vuajnë nga veshkat, ku krahas trashëgimisë, një faktor që shton sëmundshmërinë është kequshqyerja.