Guterres mesazh për Trump: Asnjë objektiv ushtarak nuk justifikon shkatërrimin e një shoqërie

Sekretari i Përgjithshëm i Kombeve të Bashkuara, Antonio Guterres ka reaguar me shqetësim të thellë ndaj retorikës së fundit luftarake, duke dënuar çdo sugjerim që vë në shënjestër popullata civile apo infrastrukturën shoqërore.

Përmes zëdhënësit të tij, Stephane Dujarric, kreu i OKB-së u shpreh se është “thellësisht i tronditur” nga deklaratat që nënkuptojnë se një popull apo qytetërim i tërë mund të mbajë pasojat e vendimeve politike dhe ushtarake. Guterres zgjodhi të mos e përmendte specifikisht emrin e Presidentit Donald Trump, reagimi erdhi si një përgjigje e drejtpërdrejtë ndaj paralajmërimit të udhëheqësit amerikan drejtuar Iranit të martën. Trump deklaroi se “një qytetërim i tërë do të vdesë sonte” nëse Ngushtica e Hormuzit nuk rihapet menjëherë për lundrim.

”Nuk ka asnjë objektiv ushtarak që justifikon shkatërrimin në masë të infrastrukturës së një shoqërie ose shkaktimin e qëllimshëm të vuajtjeve mbi popullatën civile”,- tha zëdhënësi Dujarric në emër të Sekretarit të Përgjithshëm. Guterres shfrytëzoi këtë moment për t’u bërë thirrje liderëve botërorë që të ulin tensionet dhe të kthehen në tryezën e bisedimeve. Ai nënvizoi se udhëheqësit ende kanë në dorë të zgjedhin “dialogun mbi shkatërrimin” dhe se kjo zgjedhje duhet bërë pa humbur kohë.