Hapen korridore pyjore në Tiranë për të lehtësuar ndërhyrjen ndaj zjarreve, kërkohet ashpërsi ndaj shkaktarëve

Prefektura e Tiranës, në bashkëpunim me Agjencinë e Parqeve dhe Rekreacionit të Bashkisë Tiranë, ka nisur hapjen e korridoreve pyjore me qëllim krijimin e aksesit më të shpejtë për mjetet zjarrfikëse në zonat me rrezik zjarri. Punimet po zhvillohen mbi gjurmët e rrugëve të vjetra pyjore, të përdorura më herët edhe nga ushtria.

Këto segmente do të shërbejnë si rrugë ndërhyrjeje për strukturat e emergjencave, por edhe si akses për vizitorët që frekuentojnë zonat kodrinore të qarkut. Gjatë inspektimit të punimeve në terren, prefekti i qarkut Tiranë, Shkëlqim Hajdari, kërkoi masa të rrepta ndaj personave që shkaktojnë zjarre, qoftë nga pakujdesia apo me dashje.

“Mendojmë që edhe me ushtri nga krahu tjetër, por edhe me Drejtorinë Pyjore edhe me këtë frontin që po zhvillohet këtu, në fund të muajit korrik, qarku i Tiranës do t’i ketë të hapura të gjitha rrugët pyjore për t’u mbuluar me shërbim zjarrëfikës”, tha Hajdari. Ai apeloi ndaj forcave të rendit që të rrisin kontrollet dhe të marrin masa ndaj çdo personi që mund të jetë përgjegjës për zjarret.

“Duke nisur nga muaji qershor dhe deri në muajt e vjeshtës asnjëherë nuk duhet përdorur zjarri për eliminimin e mbeturinave bujqësore. Edhe pse ata mendojnë që duke pasur një sasi të vogël mbeturinash ose sipërfaqe të vogla mund ta eliminojnë, por në këto temperatura dhe në këtë thatësirë zjarri merr përmasa dhe shkakton dëme që ju e keni parë vitet e kaluara”, shtoi ai.

Sipas planit të miratuar, në të gjithë qarkun e Tiranës do të hapen rreth 100 kilometra rrugë pyjore, së bashku me një gjatësi të ngjashme degëzimesh që do të përmirësojnë mbulimin e zonave pyjore. Drejtoresha e Agjencisë së Parqeve dhe Rekreacionit, Julinda Dhame, bëri të ditur se është hartuar edhe një plan masash kundër zjarreve, ndërsa janë krijuar grupe të përbashkëta pune me institucionet e tjera për të reaguar më shpejt ndaj situatave problematike.