Hapet rruga për ekstradimin e Selami Simsek, shtetasi turk humb dhe një betejë

Hapet rruga për ekstradimin e Selami Simsek, shtetasit turk  i akuzuar si pjesë e lëvizjes “Gylen”. Gjykata Administrative rrëzoi sot kërkesën e turkut për sigurimin e padisë. I arrestuar më 8 qershor të vitit të kaluar, 2019, së bashku me mikun e tij Harun Çelik në aeroportin e Rinasit, në përpjekje për t’u larguar në Kanada me dokumenta të falsifikuara i kërkonte gjykatës të mos ekzekutohej vendimi i Komisionit që i refuzoi kërkesën për azil. Kjo i hapi rrugë dëbimit të tij nga Shqipëria.

Shansi i fundit?

Brenda 5 ditësh ky vendim mund të apelohet. Prej ndalimit, Selami Simsek ka qenë në paraburgim dhe hetimi për të ka vijuar për falsifikim të dokumenteve. Bashkatdhetari i tij, mësuesi turk Harun Çelik, pas vuajtjes së dënimit për falsifikim dokumentesh, u deportua drejt Turqisë, edhe pse kishte kërkuar azil politik. Çelik konsiderohet si mbështetës i lëvizjes Gyleniste, e cila është cilësuar nga presidenti Erdogan si organizatë terroriste që pas grushtit të dështuar të shtetit në korrik 2016. Për rastin e mësuesit Harun Çelik, nuk kanë munguar reagimet e opozitës, që kërkoi transparencë nga autoritetet e drejtësia dhe nga qeveria. Por asnjë përgjigje nuk erdhi nga organet shtetërore. /Ora News