Helmohen 56 studentë të Policisë, gazetarja Lala: Tafani nuk rezulton të ketë dalë jashtë vendit

56 studentë të Akademisë së Policisë janë paraqitur me simptoma helmimi në shërbimin infektiv, pasi dyshohet se kanë konsumuar ushqim të kontaminuar në ambientet e Akademisë. Gazetarja Klodiana Lala thotë se hetimet janë përqendruar te kompania që kishte kontratë me Akademinë e Policisë për furnizimin me ushqim.

”Bëhet fjalë për 56 persona dhe në kuadër të këtyre hetimeve është proceduar kompania e lidhur me Nikolin Jakën, e cila kishte një marrëveshje me Akademinë e Policisë. Policia ka njoftuar institucionet përkatëse dhe AKU-në. Njëri nga studentët e Akademisë ka pretenduar se kishte konstatuar që brokoli ishte i thartuar.

Janë marrë mostrat e gjithë vaktit të drekës dhe deri tani janë arrestuar dy persona, të dyshuar për tregtim të ushqimeve të rrezikshme. Është arrestuar kuzhinieri, i cili do të përballet me gjykatën, si edhe teknologia Kristiana Plaka.

Ndërkohë është shpallur në kërkim Alma Tafani, administratorja e kompanisë dhe bashkëjetuesja e Nikolin Jakës. Ajo nuk rezulton të ketë dalë jashtë vendit, por nuk është gjetur në banesë dhe deri në këto momente nuk është paraqitur për të dhënë shpjegime para policisë. Ky rast na tregon se problematika me sigurinë ushqimore në vend mbetet një nga shqetësimet më të mëdha”,-tha në emisionin “Të Paekspozuarit”.