Hita në aeroportin e Rinasit: Përpunohen deri në 56 mijë pasagjerë në ditë, garantojmë sigurinë

Në kulmin e sezonit turistik, kur Aeroporti Ndërkombëtar i Rinasit po përballet me fluksin më të lartë të hyrje-daljeve në vend, Drejtori i Përgjithshëm i Policisë së Shtetit, Skënder Hita, dhe Drejtori i Përgjithshëm i Doganave, Besmir Beja, zhvilluan një inspektim të përbashkët për të ndjekur nga afër zbatimin e masave të marra nga strukturat e Policisë Kufitare dhe Doganës për përballimin e këtij fluksi.

Gjatë inspektimit u vlerësua angazhimi maksimal i punonjësve të Policisë së Shtetit dhe administratës doganore, të cilët po përballojnë me profesionalizëm përpunimin e rreth 50 mijë deri në 56 mijë pasagjerëve në ditë, duke garantuar njëkohësisht lëvizjen e shpejtë të qytetarëve dhe turistëve, si dhe standarde të larta sigurie.

Drejtori i Përgjithshëm i Policisë së Shtetit, Skënder Hita, theksoi se ky rezultat është bërë i mundur falë një sërë masash organizative dhe teknike të ndërmarra nga Komisariati i Policisë Kufitare Rinas. Gjatë sezonit turistik, të gjitha shërbimet e Policisë Kufitare kanë kaluar në regjim shërbimi 12-orësh, duke rritur me rreth 20 për qind praninë e efektivëve në Aeroportin Ndërkombëtar të Rinasit.

“Gjithashtu, është ulur nga 16 në 12 vjeç mosha minimale e përdoruesve të sistemit të kontrollit automatik e-Gate, duke rritur ndjeshëm numrin e pasagjerëve që përpunohen në mënyrë automatike dhe duke shkurtuar kohën e pritjes. Paralelisht, është përmirësuar dhe përditësuar sistemi TIMS, ndërsa janë riparuar ose zëvendësuar me pajisje të reja kompjuterët, lexuesit e dokumenteve dhe pajisje të tjera të kontrollit kufitar, çka ka rritur më tej shpejtësinë dhe cilësinë e shërbimit”, tha Hita.

Krahas menaxhimit të fluksit, sipas Hitës, vëmendje e veçantë i është kushtuar parandalimit dhe goditjes së krimeve ndërkufitare, me fokus luftën kundër trafikut të lëndëve narkotike, kontrabandës dhe migracionit të paligjshëm.

Hita siguroi se Policia Kufitare është angazhuar maksimalisht për të garantuar një përpunim të shpejtë dhe të sigurt të pasagjerëve, ndërsa paralelisht vijojnë kontrollet e bazuara në analizën e riskut për goditjen e çdo aktiviteti kriminal.

Ai nënvizoi se bashkëpunimi me Drejtorinë e Përgjithshme të Doganave ka sjellë rezultate konkrete në luftën kundër trafikut të lëndëve narkotike, kontrabandës dhe migracionit të paligjshëm, duke garantuar një nivel të lartë sigurie në Pikën e Kalimit Kufitar Rinas.