Holanda: Shqiptarët, sa gjysma e emigrantëve që kemi kapur

Qeveria holandeze thotë se këtë vit janë kapur 840 emigrantë në përpjekje për të hyrë në mënyrë të paligjshme në Britaninë e Madhe, duke u nisur nga Holanda.

Numri i tyre është në rritje në krahasim me vitin 2015, kur ishin kapur 500 emigrantë. Këta të fundit fshehen në kamionë për të kaluar me anije nga Holanda në Angli.

Ministria e Drejtësisë thotë se gati 80% e tyre janë kapur në portet holandeze, kurse pjesa tjetër sapo zbresin në Britani.

Pjesa më e madhe e këtyre emigrantëve që tentojnë të shkojnë në Britani për një jetë më të mirë janë shqiptarë.

Sipas shifrave zyrtare të qeverisë holandeze, gjysma e emigrantëve të kapur janë nga Shqipëria.