Humb jetën shefi i drejtorisë anti-narkotik, dyshohet vetëvrasje
Shefi i Sektorit të Narkotikëve në Drejtorinë e Policisë Qarku Korçë ka humbur jetën mëngjesin e sotëm dhe sipas Policisë së qytetit juglindor dyshohet për vetëvrasje.
Burime policore konfirmojnë se rreth orës 08.10 të mëngjesit, oficeri i Policisë (Shef i Sektorit të Narkotikëve në Drejtorinë e Policisë Qarku Korçë) shtetasi Erion Bino, 30 vjeç, banues në lagjen 9 Korçë, dyshohet se ka qëlluar veten, me armën e tij të zjarrit tip “Pistoletë”.
Bino, sqaron policia është dërguar në Spitalin Rajonal të Korçës, por ka ndërruar jetë. Menjëherë u ngrit Grupi Hetimor, i cili po kryen veprimet në vendngjarje, për të zbardhur rrethanat e kësaj ngjarje. Veprimet kryesohen nga Prokuroria e Rrethit Gjyqësor Korçë.