IKMT do të kryejë të dielën një shpërthim të komanduar në një pallat 12 katësh të dëmtuar nga tërmeti në Lagjen 17 në Durrës. Banorët në një rreze prej 200 metrash këshillohen të lënë dyert e dritaret hapur, të ulin objektet e pafiksuara në dysheme dhe mos qëndrojnë në shtëpi për të shmangur pasojat e valës goditëse.
Të dielën do të nisë shembja e këtij pallati 12 katësh, (shiko videon), në Lagjen 17 në Durrës, i dëmtuar nga tërmeti i 26 nëntorit. Operacioni është i vështirë për shkak se objeki ka mure betoni 40 cm dhe delikat për shkak të pozicionit ku ndodhet. Ndaj puna aty do të jetë graduale.
Të dielën, me shpërthim të komanduar, IKMT do të shembë muret e brendshme të objektit.
”Shpërthim i brendshëm për dobësimin e konstruksionit të brendshëm, që të krijohet mundësia për rënie sa më të lehtë të objektit. Ky bojekt përbëhet prej 14 muresh beton arme me dy zgara hekuri.”
Por, banorët e pallateve ngjitur u tremben pasojave të shpërthimit tek shtëpitë e tyre.
Drejtori i zbatimit të vendimeve në IKMT Fatmir Meta tha se po punohet që të minimizohen sa më shumë dëmet tek ndërtesat aty pranë.
”Do të përdorim sa më pak lëndë plasëse, që të minimizojmë dëmet anësore.”
Pas shpërthimit të ditës së dielë, rrëzimi i plotë i ojektit pritet të zgjase rreth dy javë.