Një qytetar i ardhur nga diaspora e Shtutgartit iu bashkua protestës para Kryeministrisë, ku nga sheshi përcolli një mesazh të fortë për ndërgjegjësim qytetar dhe distancim nga militantizmi politik. Duke vlerësuar pjesëmarrjen dhe vendosmërinë e protestuesve, ai deklaroi se qytetarët e lirë përbëjnë forcën që i frikëson pushtetarët.
“Vij nga diaspora e Shtutgartit. Aq shpirtra të lirë sa ka ky shesh nuk janë parë ndonjëherë. Jemi njerëz që as nuk shitemi, as blihemi”, u shpreh ai. Protestuesi ngriti shqetësimin për emigrimin masiv dhe pasojat që, sipas tij, mund të sjellë vazhdimi i të njëjtit sistem politik edhe në dekadat e ardhshme.
“Nëse vijojmë edhe me këtë sistem edhe 20-30 vite, do të mbeten shqiptarë vetëm në qendrat e disa qyteteve dhe s’do të ketë më shqiptarë askund!”, deklaroi ai.
Në fund, ai u bëri apel qytetarëve që të vendosin familjen, dinjitetin dhe të ardhmen e vendit mbi çdo përkatësi partiake. “Duajeni veten, familjen, hiqni dorë nga partia! Nuk u kemi asnjë borxh këtyre që na detyruan të ikim nga familjet tona dhe vendi ynë”, përfundoi ai.