Imzot Gjergj Meta: sfidat, 10 vjet pas vizitës së Papës Françesku në Shqipëri

Marrë nga Vatican News

Në një koment për Radio Vatikanin/Vatican News, kryetari i Konferencës Ipeshkvnore të Shqipërisë nënvizon se porositë e Papës Françesku, 10 vjet pas vizitës së tij në atdheun e shqipeve, si dashuria për të tjerët, vëllazërimi, dialogu ndërfetar, vlejnë edhe sot për besimtarët e për Kishën në Shqipëri.

E mbajnë mend të gjithë si një lloj maratonomaku, që shkonte me vrap kudo, që gjendej kudo, që kujdesej për gjithçka. Është imazhi i përgjegjësit të atëhershëm të Qendrës për Komunikimin gjatë udhëtimit të Papës Françesku në Shqipëri më 21 shtator 2014, don Gjergj Metës.

Tani ipeshkëv e kryetar i Konferencës Ipeshkvnore të Shqipërisë, imzot Gjergj Meta i kujton me nostalgji ditët frenetike përgatitore për atë shtegtim apostolik të Atit të Shenjtë, si sot, 10 vjet më parë, duke vënë në dukje si u prit Papa jo vetëm nga katolikët, por nga e gjithë shoqëria shqiptare, pavarësisht nga përkatësia fetare, politike e ideologjike. Porositë e Papës, sidomos dashuria e kujdesi për të të tjerët e vëllazërimi ndërmjet njerëzve me fe të ndryshme – model shqiptar për t’u marrë si shembull – kanë të njëjtën vlerë edhe sot e kësaj dite, kur shoqëria shqiptare ka ndryshuar e përballon sfida të tjera, të ndryshme nga 10 vjet më parë.