Inceneratori i Tiranës, SPAK mbyll hetimet. Çohen për gjykim 10 të pandehur, akuzohen për 30 mln euro abuzim

Prokuroria e Posaçme Kundër Korrupsionit dhe Krimit të Organizuar (SPAK) ka përfunduar hetimet për një nga fraksionet kryesore të dosjes voluminoze të inceneratorit të Tiranës. Organi i akuzës ka dorëzuar zyrtarisht në Gjykatën e Posaçme (GJKKO) kërkesën për kalimin e çështjes për gjykim për 10 persona të pandehur.

Sipas hetimeve të SPAK, dëmi financiar dhe abuzimet e kryera nga ky grup personash kapin vlerën e rreth 30 milionë eurove.

Lista e të pandehurve që dërgohen në gjyq
Personat që do të përballen me drejtësinë janë emra të njohur të përfshirë në menaxhimin dhe pronësinë e kompanive koncensionare, si dhe bashkëpunëtorë të tyre:

Mirel Mërtiri
Klodian Zoto
Dashamir Ymeraj
Arjola Kodra
Denisa Tollkucci
Elton Bualli
Endrit Habilaj
Renato Nallbani
Giuseppe Ciaffaglione
Marc Richard Lappat

Akuzat e rënda: Nga mashtrimi te grupi i strukturuar
Prokuroria e Posaçme ka ngritur një sërë akuzash të rënda ndaj të pandehurve, duke i konsideruar veprimet e tyre si një aktivitet të mirëorganizuar kriminal. Akuzat zyrtare përfshijnë:
“Mashtrimi me pasoja të rënda” (e kryer në bashkëpunim)
“Pastrimi i produkteve të veprës penale ose veprimtarisë kriminale”
“Grupi i strukturuar kriminal”
“Kryerja e veprave penale nga organizata kriminale”

Gjykim në mungesë
Të 10 të pandehurit pritet të gjykohen në mungesë. Që prej qershorit të vitit 2024, kur SPAK lëshoi masat e sigurisë ndaj tyre, Policia e Shtetit nuk ka arritur të ekzekutojë asnjë nga urdhër-arrestet, pasi të dyshuarit rezulton se janë larguar jashtë vendit për t’i shpëtuar drejtësisë.
Shënim: Ky është vetëm një nga fraksionet e hetimit të nisur për inceneratorin e Tiranës. SPAK bën me dije se hetimet po vijojnë me intensitet të lartë për fraksionet e tjera të kësaj dosjeje, ku pritet të ketë të pandehur të tjerë të përfshirë në këtë aferë.