Incident në Theth, disa persona gjuajnë me molotovë fadromat e IKMT

Situata në Theth po përshkallëzohet ndërsa Inspektorati Kombëtar i Mbrojtjes së Territorit (IKMT) vazhdon aksionin për prishjen e ndërtimeve pa leje në zonën e mbrojtur. Mëngjesin e sotëm, tensionet kanë marrë një kthesë të rrezikshme, pasi persona ende të paidentifikuar kanë qëlluar me koktej molotovi në drejtim të mjeteve të IKMT-së dhe urës kryesore në lagjen “Gjelaj”.

Menjëherë pas sulmit, forcat e rendit kanë rrethuar zonën dhe kanë nisur hetimet për të identifikuar dhe kapur autorët. Për shkak të seriozitetit të situatës, forca të shumta nga Forcat e Ndërhyrjes së Shpejtë (FNSH) janë nisur nga Tirana drejt Thethit për të forcuar praninë e shtetit dhe për të garantuar mbarëvajtjen e operacionit.

Ngjarja shënon një tjetër episod të rëndë në përpjekjet për rivendosjen e ligjshmërisë në këtë zonë turistike me rëndësi të veçantë mjedisore, ku ndërtimet pa leje janë kthyer në një problem të theksuar vitet e fundit. Autoritetet kanë theksuar se aksioni do të vijojë pavarësisht kundërshtimeve, ndërsa pritet që masat e sigurisë të shtohen më tej në ditët në vijim.