INUK kalon në varësi të Ministrisë së Brendshme

Inspektoriati Ndërtimor Urbanistik Kombëtar ka kaluar në varësi të Ministrisë së Brendshme, nga Ministria e Zhvillimit urban. Ashtu siç ishte lajmëruar më herët nga ana e kryeministrit Edi Rama, edhe Komisioni i Ligjeve ka miratuar vendimin për kalimin e INUK në varësi të Ministrisë së Brendshme.

Pak javë më parë kryeministri Rama deklaroi ndryshimin në fjalë, duke ia kaluar Ministrisë së Brendshme kompetencat e INUK, për të bërë siç tha ai që të ketë një inspektorat për mbrojtjen e territorit të vendit tonë.

Prej kohësh tashmë INUK zhvillon aksione në të gjithë vendin për prishjen e ndërtimeve të shumta pa leje si dhe lirimin e hapësirave publike. Në këtë periudhë, janë mbi 1 mijë objektet e kundërligjshme që janë goditur nga INUK. Aktualisht INUK drejtohet nga Dallëndyshe Bici pas largimit nga detyra të Zyhdi Dajtit.