Irani refuzon planin e Trump me 15 pika, goditet aeroporti i Kuvajtit

Iran ka refuzuar një propozim amerikan me 15 pika për ndaljen e luftës, duke zgjedhur të vijojë operacionet ushtarake ndaj Israel dhe disa vendeve të Gjirit.

Sipas raportimeve të mediave shtetërore iraniane, përfshirë Press TV, një zyrtar anonim ka konfirmuar se Teherani i ka dhënë përgjigje negative planit të propozuar nga Donald Trump.

“Irani ka reaguar negativisht ndaj një propozimi amerikan që synonte t’i jepte fund luftës së imponuar. Fundi i luftës do të ndodhë kur Irani të vendosë se duhet të përfundojë, jo kur presidenti amerikan Donald Trump e imagjinon përfundimin e saj”, citohet të ketë thënë zyrtari.

Ndërkohë, tensionet në rajon janë përshkallëzuar më tej, pasi Irani ka ndërmarrë sulme të reja, përfshirë edhe një goditje që shkaktoi një zjarr të madh në Aeroportin Ndërkombëtar të Kuvajtit.

Më herët, dy zyrtarë pakistanezë kishin përshkruar në mënyrë të përgjithshme përmbajtjen e planit amerikan, i cili përfshinte lehtësimin e sanksioneve ndaj Iranit, kufizime në programin bërthamor, kontrolle mbi raketat balistike, si dhe rihapjen e Ngushticës së Hormuzit, një korridor strategjik përmes të cilit kalon rreth 20% e naftës botërore.

Një zyrtar egjiptian i përfshirë në përpjekjet ndërmjetësuese e cilësoi propozimin si një “marrëveshje gjithëpërfshirëse”, duke shtuar se ai përfshinte gjithashtu kufizime në mbështetjen e Iranit për grupet e armatosura në rajon.

Refuzimi i planit dhe vijimi i sulmeve tregojnë për një përshkallëzim të situatës në Lindjen e Mesme, ndërsa përpjekjet diplomatike për arritjen e një marrëveshjeje mbeten ende pa rezultat.