Ja si ndodhi plagosja në Shëngjin, arrestohet autori

Zbardhet ngjarja e ndodhur me datë sot në Shëngjin, në orën  14:30, ku mbetën të plagosur 2 shtetas.  Arrestohet në flagrancë autori i dyshuar, Gertjan Malshi. Sekuestrohen 1 armë gjahu “Shotgan” , 19 fishekë dhe mjete të forta të përdorura në konflikt.

Njoftimi i policisë Lezhë:

Me datë  17.06.2016, nga Sektori i Krimeve të Rënda, u  bë arrestimi në flagrancë i shtetasit :

Gertjan Malshi, 38 vjeç ,banues në Pllanë.

Ky shtetas dyshohet se ka konsumuar veprën penale « Vrasje në rrethana të tjera cilësuese » mbetur në tentative, parashikuar nga neni 79/dh-22 të  Kodit Penal.

Me datë 17.06.2016 rreth orës 14 :30 ,  është njoftuar se në vendin e  quajtur “Rruga e Kunës” në Qytetin e Shëngjinit,  ka ndodhur një  plagosje me armë. Menjëherë në vendngjarje kanë mbërritur forcat policore që falë ndërhyrjes së shpejtë kanë bërë të mundur parandalimin e përshkallëzimit të situates deri në vrasje , duke kapur dhe shoqëruar palët në konflikt si dhe sekuestruar armën dhe mjetet e përdorura.

Nga veprimet hetimore është konstatuar se  shtetasi Gertjan Malshi, pas një konflikti me shtetasin G.A. 52 vjeç,  shtetasen M.A. 49 vjeçe , dhe shtetasin  K.A. 18 vjeç , banuesë të gjithë  në Mal- Shëngjin ( pjesëtarë të një familje)  ka qëlluar me armë gjahu në drejtim të tyre.

Për pasojë ka mbetur e plagosur shtetasja M.A. cila pas dhënies ndihmës së parë mjekësore është dërguar për ndihmë  më të specializuar në  spitalin e Tramues në  Tiranë.

Po kështu të plagosur në konflikt e sipër me mjete të forta kanë mbetur  shtetasi G.A.,  shtetasi K.A. si dhe autori i dyshuar  Gertjan Malshi të cilët pas ndihmës mjekësore në spitalin e Lezhës ndodhen jashtë rrezikut për jetën.

Gjatë  kqyerjes së  vendit të  ngjarjes janë gjetur dhe sekuestruar në  cilësinë provës materiale :

– Një armë gjahu e tipit “Shotgan”

– Automjeti në pronësi të shtetasit Gertjan Malshi

– 19  fishekë arme gjahu

–  sende të forta  të përdorura në konflikt

 Nga veprimet e para hetimore të  kryera ka rezultuar se palët  janë  konfliktuar për motive të dobëta. Gjithashtu do të referohen materialet në Prokurorinë e Rrethit Gjyqësor Lezhë edhe në ngarkim të shtetasit G. A. për kryerjen e veprës penale “Plagosje e lehtë me dashje”, parashikuar nga neni 89  i  Kodit Penal.