Japonia, 6 milionë jenë ndihma Shqipërisë për përmbytjet

Ditën e djeshme, qeveria e Japonisë miratoi dhënien e ndihmës përmes mallrave të asistencës së emergjencës me vlerë prej 6 milionë jenësh (batanije, dyshekë etj) për Republikën e Shqipërisë përmes Agjensisë Japoneze për Bashkëpunim Ndërkombëtar (JICA), në përgjigje të kërkesës së qeverisë shqiptare si pasojë e dëmeve të mëdha shkaktuar nga përmbytjet e ndodhura në vend.

 Pjesa jugore e Shqipërisë po vuan si pasojë e përmbytjeve të shkaktuara nga reshjet e shumta të shiut nga 31 Janari në 2 Shkurt si dhe shkrirjes së dëborës nga malet në lumenjtë e zonës. Duke iu referuar raporteve të Federatës Ndërkombëtare të Kryqit të Kuq dhe Shoqërive të Gjysmë-Hënës së Kuqe, deri më 11 Shkurt është raportuar 1 person i vdekur dhe rreth 8000 njerëz janë prekur rëndë nga përmbytja.

Në këtë kuadër, qeveria e Japonisë vendosi të japë asistencë emergjence nisur nga këndvështrimi humanitar për viktimat, por gjithashtu edhe në kuadër të marrëdhënieve miqësore midis Japonisë dhe Republikës së Shqipërisë.