”Jeta ime u shkatërrua brenda pak çastesh”, shqiptari humb familjen në aksidentin tragjik në Greqi

Komuniteti i Paleokomit në Serres vijon të jetë i tronditur pas aksidentit tragjik ku humbën jetën një 43-vjeçare shqiptare dhe djali i saj 21-vjeçar, teksa po udhëtonin drejt punës. Bashkëshorti dhe babai i viktimave, mes dhimbjes së madhe, u shpreh për televizionin grek ERT: “Humba gruan dhe fëmijën tim. Ata po shkonin në punë. Humba gjithçka”.

Aksidenti ndodhi mëngjesin e së premtes në rrugën provinciale Amfipolis-Drama, pranë Paleokomit. Sipas hetimeve paraprake, automjeti i drejtuar nga 21-vjeçari kaloi në korsinë e kundërt dhe u përplas ballë për ballë me një kamion. Përplasja ishte fatale për nënën dhe djalin, të cilët humbën jetën në vendngjarje.

Shoferi i kamionit, 56 vjeç, i cili pësoi dëmtime të lehta, tha se makina i doli papritur përpara dhe nuk pati kohë të shmangte përplasjen. Pamjet nga kamera e kamionit pritet të ndihmojnë autoritetet në zbardhjen e plotë të rrethanave të aksidentit.

Familja shqiptare jetonte prej vitesh në Paleokom dhe ishte e njohur si e integruar dhe e respektuar në komunitet. Banorë të shumtë kanë shprehur ngushëllimet e tyre pas kësaj tragjedie.