Jonid Jorgji përzgjidhet anëtar i Akademisë Evropiane të Filmit, një hap i madh për kinematografinë shqiptare

Kryetari i QKK-së i bashkohet institucionit prestigjioz që bën bashkë mbi 5,700 profesionistë të industrisë evropiane të filmit.
Kryetari i Qendrës Kombëtare të Kinematografisë (QKK), Jonid Jorgji, është përzgjedhur zyrtarisht si anëtar i Akademisë Evropiane të Filmit (European Film Academy – EFA). Lajmi është bërë i ditur nga vetë QKK, e cila e konsideron këtë pranim si një vlerësim të lartë për kontributin dhe vizionin e Jorgjit në sektorin audiovizual.
Sipas njoftimit zyrtar, ky anëtarësim shënon një hap të rëndësishëm për rritjen e përfaqësimit të industrisë sonë kinematografike në arenën ndërkombëtare. Përmes kësaj ure të re lidhëse me EFA-n, zëri dhe projektet e kineastëve shqiptarë pritet të kenë një jehonë edhe më të madhe në Evropë.
Përfshirja e Jonid Jorgjit në strukturat e EFA-s vjen në një moment kyç dhe dinamik për reformimin e filmit shqiptar. Vitet e fundit, Shqipëria ka shtuar përpjekjet e vazhdueshme për t’u shndërruar në një destinacion të rëndësishëm kinematografik për prodhimet e huaja dhe ato rajonale.
Çfarë është Akademia Evropiane e Filmit?
E krijuar në vitin 1989, EFA është organizata më prestigjioze e filmit në kontinent.
Ajo bashkon mbi 5,700 profesionistë evropianë të fushës së kinematografisë.
Promovon dhe mbështet kinemanë evropiane përmes edukimit të audiencës dhe ruajtjes së trashëgimisë filmike.
Akademia njihet botërisht për organizimin vjetor të Çmimeve Evropiane të Filmit (European Film Awards), të konsideruara si “Oscar-i” i Evropës.
Ky sukses i ri i kreut të QKK-së premton t’i hapë rrugë bashkëpunimeve të reja dhe një qasjeje më të lehtë të kineastëve shqiptarë në fondet dhe platformat e mëdha evropiane.

AV / KJ