Jorida Tabaku: Integrimi Europian, proces që prek qytetarët në çdo aspekt të jetës së tyre

Kryetarja e Komisionit për Çështjet Evropiane, deputetja e PD-së Jorida Tabaku, thotë se procesi i integrimit të Shqipërisë në BE ka fatin e keq të jetë marrë peng nga qeveria dhe burgosur në sirtaret e zyrave të saj.

”Sa herë që dëgjojmë për këtë proces, ndjejmë lodhje sepse na kujton atë pengmarrje që nuk po u jep shqiptarëve shansin të provojnë mundësinë për të ndërtuar Evropën këtu, në vendin tonë”,-tha Tabaku. Po ashtu Tabaku shtoi se integrimi nuk është thjesht një proces burokratik që zhvillohet në zyrat e administratës, por është një proces që prek qytetarët në çdo aspekt të jetës së tyre.

Për të ndërtimi i një demokracie të qëndrueshme dhe institucionale është kyç. ”Shqipëria është pjesë e Evropës, por pyetja mbetet: A është demokracia jonë vërtet një demokraci institucionale? A jemi ne pjesë e perëndimit dhe vlerave të BE kur vjen puna te demokracia dhe sundimi i ligjit? Kur sheh se si institucionet përdoren për propagandë dhe jo për reforma reale kundër korrupsionit, dhe si shteti është në funksion të pakicës dhe jo shumicës, natyrisht kupton rrugën e gjatë përpara dhe nevojën për ndryshim”, theksoi Tabaku.