PS është në një proces riorganizimi por a ka menduar kryetari i socialistëve Edi Rama, njëkohësisht kryeministër, për të vendosur filtra në mënyrë që kandidatët për bashkinë të mos i kapë ligji i dekriminalizimit? Në një prononcim për mediat, i pyetur për kandidatët me të kalur të errët, Rama tha se nuk i verifikojnë dot. Valdrin Pjetri dhe Agim Kajmaku, dy socialistët e zgjedhur si kryetarë bashkie, njëri i Shkodrës, tjetri i Vorës në zgjedhjet e 30 qershorit u shkarkuan pasi kanë fshehur të kaluarën, ndërkohë nën akuzë është dhe kryebashkiaku i Vaut të Dejës, Mark Babani. Ndaj Agim Kajmakut është prerë dhe urdhërarrest.
Pjesë nga deklarata
E kam thënë dhe rithem të gjitha virgjireshat që thonë të kundërtën u ngjajnë përgjegjëseve të shtëpive të qejfit që predikojnë moral. Është një çështje që mund të zgjidhet vetëm përmes fuqizimit të ligjit në raport me individin duke e kthyer vetëdeklarimin e rremë në një vepër që dënohet ashpër.
Nga ana tjetër duke i çliruar partitë nga kjo barrë për të lexuar mëndjen e individëve që në mënyrë të papërgjegjshme i shmangen së vërtetës kur vetëdeklarohen përmes një ndërhyrjeje në ligj që do të japë mundësi institucioneve ligjzbatuese të bëjnë verifikime pasi partitë të çojnë listat e kandidatëve për tu zgjedhur në një kohë më përpara se fillimi i fushatës. Në një mënyrë që kur të nisë fushata të gjitha listat të jenë të verifikuara.
Partitë nuk kanë kapacitete për të bërë punën policisë apo prokurorisë, por nga ana tjetër policia e prokuroria duhet të futen në proces më parë. Kush predikon moral është shëmbëlltyrë njësoj si ato përgjegjëset e shtëpive të qejfit që predikonin virgjërinë e vazhave që ofrojnë brenda shërbimin.