Kandidati Këlliçi sqaron deklaratën e bujshme: E vërteta e biletës së urbanit që do heq

Kandidati i koalicionit ”Bashkë Fitojmë” për bashkinë e Tiranës, Belind Këlliçi sqaroi në emisionin ”Now”, deklaratën e bujshme se do të mundësojë transport falas për banorët e kryeqytetit.

Këlliçi u shpreh se nuk bëhet fjalë për transport publik falas, por heqja e një pagese të dytë dhe do të ndryshojë vetëm destinacioni i fondeve. Për të shuma që shpenzohet nga qytetarët e Tiranës për transportin publik është vetëm 6,8 për qind e buxhetit bashkisë dhe lehtësisht e përballueshme.

“Pas konsultave me shoqatat e transportit publik kam marrë të dhëna se ky shërbim përdoret nga 200 mijë qytetarë në ditë, një pjesë e të cilëve subvencionohet dhe nga të cilët mbeten 140 mijë bileta që i kushtojnë qytetarëve 56 mln lekë të vjetra në ditë, ose 1,5 mln euro në muaj, ose 18 mln në vit. Buxheti i bashkisë është 240 mln euro, këto do jenë 6,8 për qind e buxhetit”, tha Këlliçi.