Kapen 3.2 tonë kanabis në Kurvelesh (VIDEO)

Ka shkuar në  3.2 tonë cannabis sativa, sasia e drogës së sekuestruar nga Policia e Gjirokastrës në një stan në Kurvelesh në vijimësi të operacionit të koduar “llufa”.

1 ton lëndë narkotike, shumica në formë boçe në proces tharje u gjet në një stan në vendin e quajtur Llufe në malin e Kurveleshit gjatë paradites së të premtes.

Ndërsa pjesa tjetër prej 2.2 tonë bimë narkotike, e kultivuar në 4 parcela u zbulua në vijimësi të akisonit të Sektorit kundër Narkotikëve disa orë më vonë. Edhe kjo sasi droge ishte në proces tharje dhe e kultivuar. Pas sekuestrimit, droga është asgjësuar në vend me anë të djegies.

Sipas policisë personat që kanë kultivuar drogën kanë mundur të largohen në mal sapo kanë pikasur praninë e policisë por janë identifikuar dhe po punohet për kapjen e tyre.