Kapet zjarrfikësi që shiste kokainë në Roskovec

Agjencia e Mbikëqyrjes Policore informon se ka arrestuar një zjarrfikës në Roskovec, nën akuzën e prodhimit dhe shitjes së lëndëve narkotike.

Arrestimi i 22-vjeçarit E.SH u krye pasi gjatë kontrollit të kryer nga punonjësit e Forcës së Posaçme “Shqiponja” në automjetin Honda Civic që drejtonte, u gjetën 13 doza kokaine dhe një peshore elektronike, si dhe dy aparate telefonike celularë, një kartëmonedhë me prerje 50 euro dhe 1000 lekë.

Gjithashtu gjatë kontrollit të kryer në banesën e E. SH. u gjetën dhe u sekuestruan në cilësinë e provës materiale një armë zjarri “Çifte” dhe dy aparate telefonikë celularë.

Materialet procedurale u referuan në Prokurorinë Pranë Gjykatës së Shkallës së Parë të Juridiksionit të Përgjithshëm Berat, për veprën penale “Prodhimi dhe shitja e narkotikëve” dhe “Prodhimi dhe mbajtja pa leje e armëve të gjahut dhe sportive”.