Kapja e “Babagjyshëve”, Rama-Tahiri përgëzojnë policinë

Kryeministri Edi Rama dhe ministri i Brendshëm, Saimir Tahiri, përgëzuan Policinë e Shtetit për aksionin e arrestimit te grabitësve të qendrës tregtare në Tiranë, ngjarje e ndodhur një vit më pare.

Në rrjetin social “Facebook”, Kryeministri Rama thotë se po ikën koha e të ikurve në drejtim të paditur. “Përgëzime Policisë për arrestimin e grabitësve që morën famë si “Babagjyshat e Vitit të Ri”. Po ikën koha e të ikurve në drejtim të paditur!”, shkruan Kryeministri Rama.

Edhe ministri Tahiri ka komentuar në “Facebook” aksionin e policisë. “Babagjyshët? Një tjetër rezultat që dëshmon se Policia e Shtetit është plotësisht në krye të detyrës! Kush merr guximin të bëj krim, duhet të presë ditën që do dalë para drejtësisë. Shqipëri e sigurtë, bashkë me qytetarët e ndershëm. Bravo!”, shkruan ministri Tahiri.

Gati një vit pas grabitjes në një prej qendrave tregtare në Tiranë, policia ka arrestuar 8 persona. Burime nga policia bënë të ditur se në kuadër të operacionit të koduar “Babagjyshët” kanë rënë në pranga tetë persona, ndërsa kreu i grupit kriminal dyshohet të jetë shtetasi Ilir Kupa, i arratisur nga burgu i Trikallas në Greqi, në mars të vitit 2013. Grabitja në qendrën tregtare ndodhi në 24 dhjetor 2013, rreth orës 17:25 minuta. Katër persona, të veshur si babagjyshë të Vitit të Ri, hynë të armatosur me kallashnikovë në qendrën tregtare, duke grabitur një dyqan argjendarie.