Belind Këlliçi, kryetari i FRPD, ka ngritur pikëpyetje të mëdha mbi zgjedhjet që po zhvillohen në universitetet e Shqipërisë në një kohë kur shtetet në të gjithë botën kanë shtyrë deri edhe zgjehdjet e përgjithshme për shkak të krizës së gjithanshme të shkaktuar nga koronavirusi.
Në një shënim në Fb, Këlliçi ka argumentuar se kreu i Qeverisë, Edi Rama, po e shfrytëzon pikërisht këtë moment për të kapur edhe ato institucione që deri dje nuk i kishte shtënë dot në dorë, qoftë edhe nëpërmjet kërcënimeve të grupeve kriminale si ai i Shullazit.
Këlliçi shkruan në Fb: “52 shtete kanë shtyrë zgjedhjet politike ose lokale në të gjithë botën gjatë këtij viti për shkak të Covid-19! Vetëm Shqipëria nuk shtyn dot zgjedhjet në universitete! Pyetja është: a janë zgjedhjet në universitet më të rëndësishme se të gjitha zgjedhjet që do të mbaheshin në këto 52 shtete?!
Sigurisht që jo, por çdo vend ka prioritetet e tij! Këto 52 vende kanë prioritet shëndetin dhe jetën e qytetarëve, ndërkohë që qeveria e Edi Ramës ka prioritet vënien nën kontroll dhe kapjen e universiteteve. Atë që nuk bëri dot me Shullazin, kërkon ta bëjë me koronavirusin!”