Karakaçi: Paketa për transportin publik pritet të miratohet javën e ardhshme

Ministri i Infrastrukturës dhe Energjisë, Enea Karakaçi, ka deklaruar në Kuvend se javën e ardhshme pritet të miratohet një paketë mbështetëse për sektorin e transportit publik, në kuadër të masave për përballimin e situatës aktuale të çmimeve të karburanteve.

Gjatë interpelancës së kërkuar nga një grup deputetësh lidhur me çmimin e naftës në vend, ministri tha se qeveria po ndërmerr masa shumëplanëshe për stabilizimin e situatës.

Masat e qeverisë

Karakaçi u shpreh se është në proces miratimi një paketë mbështetëse për transportin publik qytetas dhe ndërqytetas, e cila pritet të finalizohet javën e ardhshme.

Ai gjithashtu bëri të ditur se është ngritur një grup pune për kontrollin e rezervave të hidrokarbureve, me qëllim verifikimin e gjendjes së depozitave dhe përputhshmërinë e tyre me legjislacionin në fuqi.

“Rezervat e sigurisë menaxhohen nga agjencitë shtetërore dhe vihen në dispozicion në rast mungese të produktit në treg. Deri tani, Shqipëria nuk është e ekspozuar ndaj këtij risku”, deklaroi ministri.

Kontroll dhe monitorim i tregut

Sipas tij, grupi i punës ka detyrë të kryejë kontrolle në terren për të garantuar funksionimin e sistemit të rezervave strategjike të hidrokarbureve dhe furnizimin normal të tregut.

Ministri shtoi se janë zhvilluar diskutime me grupet e interesit dhe se institucionet kanë reaguar në kohë ndaj situatës së krijuar në tregun e karburanteve.