Pak pasi Policia e Shtetit po priste të arrestonte disa protestues me maska, që ishin në protestë, dhe që i kishin ndjekur për t’i arrestuar ata u futen në selinë Blu, sipas policisë, por ka dalë lideri demokrat Berisha ku deklaron se ishte policia e shtetit që hodhi gaz te Selia e PD dhe disa nuk u ndjenë mirë ndaj u lajmeruan ambulancat. Berisha e cilësoi ndërhyrjen e Policisë si një akt hakmarrjeje, duke akuzuar kryeministrin Edi Rama dhe policinë për përpjekje për të manipuluar protestën dhe për të ushtruar presion ndaj opozitës.
“Njeriu që po përpiqet të përzgjedhë vendin e azilit politik, i them këtu që vendi i vetëm i azilit do të jetë qelia e burgut”, deklaroi Berisha, duke iu drejtuar kreut të qeverisë. Ai pretendoi se përpara protestës ishte përhapur një skenar për të sulmuar selitë e partive të mëdha, pasi sipas tij ishte konstatuar se Kryeministria nuk mund të merrej. “Sot, ai përhap nëpërmjet rrjetit të tij në protestë, përhap lajmin që Kryeministrinë nuk e marrim dot, ndaj duhet të sulmohen dy selitë e partive të mëdha”, u shpreh Berisha.
Sipas kreut të PD-së, ky skenar dështoi pasi protestuesit nuk iu përgjigjën thirrjeve dhe nuk u përfshinë në veprimet që ai pretendon se ishin organizuar për të cenuar protestën. “Skenari i dështoi, sepse iniciatorët, ose puthadorët e Ramës nuk i ndoqi njeri. Dështoi të sillte protestuesit që shprehnin urrejtjen ndaj partisë së krimit”, tha ai.
Berisha akuzoi më tej Policinë se ndërhyri në territorin e selisë së Partisë Demokratike pa asnjë shkak, duke hedhur sasi të mëdha gazi lotsjellës. “Policia në mënyrën më hakmarrëse dhunon territorin e Partisë Demokratike, në shkelje të ligjit dhe Kushtetutës. Jo vetëm që hedhin sasi të mëdha bombolash gazi, pa pasur motiv, vetëm reprezaljet e PD-së për dështimin e skenarit të tyre. I kanë helmuar njerëzit dhe ju e patë vetë”, u shpreh Berisha.
Berisha u ndal edhe te të miturit e përfshirë në protestë, duke thënë se Partia Demokratike do t’i mbrojë ata dhe duke akuzuar autoritetet për shkelje të ligjit. “Çdo i mitur që sulmohet, është i mitur dhe do të mbrohet nga Partia Demokratike. Ata që sulmojnë të miturit, ata shkelin ligje dhe Kushtetutën e vendit. Unë i përgëzoj demokratët që i marrin në mbrojtje të miturit”, tha Berisha.
Ndërkohë në Selinë Blu erdhën dy autoambulanca. Kurse gazetarja e Top Channel, Dorjana Bezat, ka publikuar video ku shihet kur protestuesit me maska futen me vrap drejt godinës së selisë, ndërsa policia mbërrin pak çaste më vonë pasi po i ndiqte për ti ndaluar. Gjithashtu në pamje duket momenti kur fiken dritat e katit të dytë të selisë së PD-së, sipas TCH.
(kliko videon)
Foto nga Selia e PD në fund të protestës (TCH)