Kërkoheshin në Itali, një i dënuar me 20 vite burg, prangosen në Morinë

Dy persona, njëri prej të cilëve i dënuar me 20 vite burg, tentuan të kalonin kufirin për në Kosovë, por vihen në prangat e policisë. Të dy këta persona që ishin shpallur në kërkim ndërkombëtar, u arrestuan mëngjesin e së shtunës nga policia në Pikën e Kalimit Kufitar të Morinës, në Kukës.  Policia e Shtetit bëri të ditur se, gjatë përpunimit të dokumentacionit të shtetasve u kap 48-vjeçari nga Peja e Kosovës, Ferid Toska, i shpallur në kërkim ndërkombëtar nga drejtësia italiane për “vjedhje me dhunë” dhe “pjesëmarrje në organizatë kriminale”. Gjithashtu, po në këtë pikë të kalimit kufitar u kap shtetasi në kërkim ndërkombëtar, Skënder Driza. Sipas policisë, ndaj 45-vjeçarit nga Shijaku një gjykatë italiane ka lëshuar urdhrin e arrestit dhe e ka dënuar atë me 20 vjet burg për “shfrytëzim prostitucioni” dhe “bashkëpunim në organizatë kriminale”. Të dy të arrestuarit pritet të ekstradohen drejt Italisë, për llogari të drejtësisë së vendit fqinj.