Kërkoi pavlefshmërinë e dekretit të emërimit të Ols Dados, Erion Veliaj letër KLP-së: Vendimi u mor nga nënkryetari, jo nga organi kolegjial

Një tjetër përplasje institucionale është shënuar mes kryebashkiakut të Tiranës, Erion Veliaj dhe Këshilli i Lartë i Prokurorisë, lidhur me trajtimin e statusit të prokurorit Ols Dado. Përmes një kërkese zyrtare drejtuar anëtarëve të KLP-së, Veliaj pretendon se institucioni nuk ka marrë një vendim kolegjial për kërkesën e tij mbi pavlefshmërinë absolute të dekretit të emërimit të Dados, por se çështja është trajtuar vetëm nga nënkryetari i KLP-së, Erind Gërmenji.

Sipas dokumentit, gjatë shqyrtimit në Gjykatën Administrative të Shkallës së Parë Tiranë është konstatuar mungesa e një vendimmarrjeje zyrtare të organit kolegjial për këtë çështje. Veliaj kundërshton gjithashtu përmbajtjen e një shkrese të datës 11 mars 2025, të firmosur nga Gërmenji, ku thuhet se kërkesa është shqyrtuar nga KLP-ja. Sipas tij, praktika procedurale tregon se shqyrtimi është bërë individualisht nga nënkryetari dhe jo nga vetë këshilli, siç kërkohet nga ligji.

Në argumentimin e tij, kryebashkiaku i Tiranës i referohet nenit 66 të ligjit “Për statusin e gjyqtarëve dhe prokurorëve”, duke theksuar se vetëm KLP-ja ka kompetencën për të vendosur mbi përfundimin e statusit të një magjistrati. Për këtë arsye, Veliaj e konsideron shkresën e firmosur nga Gërmenji një “akt nul”, për shkak të mungesës së një vendimi kolegjial.

Në të njëjtën kërkesë, ai ngre dyshime edhe mbi përfaqësimin ligjor të KLP-së në gjykatë, duke pretenduar se përfaqësuesja e institucionit është paraqitur pa mandat të miratuar nga organi kolegjial. Veliaj u kërkon anëtarëve të KLP-së të sqarojnë nëse kanë qenë në dijeni që nënkryetari Erind Gërmenji ka marrë personalisht në shqyrtim çështjen që lidhet me statusin e prokurorit Ols Dado.