Këshilltarët e Kukësit thirrje ambasadorëve në Tiranë: Mos e lini Shqipërinë të kthehet në shtet policor

Këshilltarët e këshillit bashkiak të qytetit të Kukësit, kanë dalë në një deklaratë për mediat, ku kërkojnë ndihmën dhe ndërhyrjen e ambasadorëve të huaj në çështjen e tarifës së vendosur në Rrugën e Kombit.

Në deklaratën e tyre, ata thonë se një vend si Shqipëria, pjesë e NATO-s dhe aspirant për në BE, nuk mund të sillet si shtet policor në prani të SHBA-ve.

‘Ne banorët e Kukësit dhe shoqëria civile kemi humbur tek politikanët shqiptarë, për shkak të arrogancës, kemi shpresën e vetme se vetëm ju ambasadorë mund të na ndihmoni.

Një vend si Shqipëria që pret të hapë negociatat, nuk mund të sillet si shtet policor në sy të SHBA-ve.

Duam t’u kthejmë shpresën fëmijëve tanë, të pyetemi dhe të merremi në konsideratë, sepse jemi bashkëpronarë të këtyre trojeve kaq të bukura që po na i vjedhin përditë’,-kanë thënë këshilltarët në deklaratën e tyre për mediat.