Kisha Ortodokse mesazh qytetarëve për 25 prillin: Zgjidhni njerëz të pastër

Edhe Kisha Ortodokse jep një mesazh për zgjedhjet parlamentare më 25 prill, ku i bën thirrje qytetarëve me të drejtë vote, që të zgjedhin njerëz të pastër.

Mesazhi i plotë

Dua që të rikujtoj edhe njëherë tjetër mendimin tonë si Kishë Ortodokse. E kemi theksuar që në vitin e parë se Kisha jonë nuk merret me Partitë Politike dhe as nuk përzihet në çështjet politike që ka vendi. Ky është parimi i parë që ne si Kishë kemi ndjekur.

Por ka dhe një parim të dytë që është mjaft i rëndësishëm – ne, të Krishterët Orthodhoksë, si qytetarë të këtij vendi duhet të jemi të përgjegjshëm dhe kemi detyrimin për të votuar. Nuk mund të themi jemi indiferentë dhe nuk merremi me çështje të tilla si këto.

Mënyra se si zgjedhim, kriteri ynë është mjaft i rëndësishëm, zgjedhim njerëz të cilët janë të pastër, që nuk vënë më parë “Unin” e tyre dhe më pas vijmë “Ne” dhe kanë aftësinë për ta çuar vendin aty ku është përparimi, kuptimi i ndërsjellë dhe ecja përpara. Dhe e përsëris – E drejta për të votuar është një detyrim mjaft i rëndësishëm që kemi ne.