Komisionerja e BE për takimin me Spiropalin: Parlamenti, rol kyç në anëtarësimin e Shqipërisë

Komisionerja Europiane për Zgjerimin, Marta Kos ka reaguar pas takimit të sotëm me Kryetaren e Kuvendit, Elisa Spiropali.

Kjo duke vlerësuar rolin e rëndësishëm të Parlamentit në procesin e anëtarësimit të Shqipërisë në Bashkimin Europian. Kos thekson rëndësinë e bashkëpunimit ndërpartiak dhe miratimit të reformave kyçe për përshpejtimin e integrimit europian.

“E dashur Elisa, ju falënderoj për takimin tonë konstruktiv! Parlamenti ka një rol vërtet jetik në procesin e anëtarësimit të Shqipërisë, miratimin e reformave kyçe dhe sigurimin e bashkëpunimit ndërpartiak. Është kjo frymë gjithëpërfshirëse dhe e dialogut që mbështet fuqishëm këtë moment të favorshëm për anëtarësimin e Shqipërisë’‘,- shkruan Kos.

Takimi mes Kryetares së Kuvendit dhe Komisioneres Europiane për Zgjerimin vjen në kuadër të angazhimeve të përbashkëta për përshpejtimin e procesit të integrimit të Shqipërisë në Bashkimin Europian.