Komiteti Teknik i Ekspertëve, ka vendosur që masat kufizuese ndaj pandemisë së Covid-19, do të vijojnë pa afat. ”Kufizimi i lëvizjes nga ora 22:00-06:00 në të gjithë vendin, me përjashtim të lëvizjes për motive pune, emergjenca shëndetësore apo nevoja të domosdoshme. Ndalohen aktivitetet e bareve, restoranteve nga ora 22:00-06:00 (përveç shërbimit delivery). Smart-working për administratën publike (sipas speçifikës së sektorit) në zbatim të protokolleve të sigurisë. Përjashtim bëjnë strukurat ofruese të shërbimeve duke zbatuar protokollet e sigurisë”,-tha zv/ministrja e Shëndetësisë, dhe kryetare e këtij Komiteti, Mira Rakacolli.
Kurse shefja e Survejancës dhe Shërbimit të Inteligjencës Epidemike në ISHP, Eugena Tomini u shpreh se masat aktuale po japin rezultat, duke sjell një ulje të lehtë të rasteve të reja. ”Vendi po vijon me intensitet të lartë me Covid-19. Incidenca vijon e lartë, kemi kaluar në 347 raste për 100 mijë banorë. Në javën e fundit kemi një tendecë në ulje. Duhet të theksohet se Tirana mban peshën kryesore, e ndjekur nga Gjirokastra dhe qarku i Lezhës. Java e fundit ka treguar një ndikim të masave të fundit”, u shpreh Tomini.
Për më tepër, Rakacolli foli dhe për kufizimet gjatë festave të fundvitit. Ajo tha se nuk do të lejohen grumbullimet më shumë se 10 persona. Rakacolli deklaroi se në varësi të zhvillimit të situatës do të vendosin më pas nëse do të lehtësojnë masat ose jo. ”Ne jemi disa javë larg krishtlindjeve dhe shohim që situata po vijon e njëjtë. Do shohim se si do shkojmë më vonë. Nëse do ndryshojmë për më mirë, nëse qytetarët bashkëpunojnë me autoritetet këto masa do ndryshojnë për mirë. Nëse ato do ndryshojnë për keq atëherë do të qëndrojnë në fuqi”,-tha Rakacolli.
Anëtari dhe mjeku Tritan Kalo, u pyet në lidhje me dyshimet e ngritura nga kreu i PD, Lulzim Basha, për fshehje të numrit të viktimave nga koronavirusi. Mjeku u shpreh se nuk mund të ketë asnjë ndërhyrje në diagnozë ose në ndryshimin e shkakut të vdekjes në kartelë, por ai theksoi se problemi është kush është shkaku parësor dhe kush është shkaku dytësor.
“Sa i përket humbjeve të jetës në shtëpi, unë nuk mund t’iu them asgjë sepse janë zyrat e gjendjes civile ose mjekët e familjes ata që mund të saktësojnë shkaqet e vdekjes. Unë mund të flas në lidhje me shërbimin e sëmundjeve infektive. Është e plotësuar mirë ligjërisht dhe shkencërisht kur plotësohet një skedë vdekje, arsyet se pse i sëmuri ka ndërruar jetë. Në këto raste nuk mund të bëhet asnjë ndërhyrje ose të krijohet një artificë, si në lidhje me ”moment-diagnozën” e pranimit, evolucionin dhe përfundimin. Në këtë rast, nuk mund të ketë asnjë lloj falsifikimi apo ndryshimi. Problemi është kush është shkaku parësor dhe kush është shkaku dytësor. Te një i sëmurë me Covid-19, jo gjithmonë sëmundja bazë është shkaku i përfundimit letal të të sëmurit ose vdekjes, por janë edhe ndërlikime që vijnë në terrene. Kemi të sëmurë me komorbozitete dhe probleme të tjera që i sëmuri i ka pasur para se të shtrohej në spital. Në terren të këtyre sëmundjeve zhvillohen edhe problematika që lidhen me vetë sëmundjen bazë. Të marrim sëmundjet malinje të gjakut, shumë prej tyre kanë ndërruar jetë. Të sëmurët që kanë probleme me dializën, dëmtimet që ndodhin, jo gjithmonë janë fatale të lidhura direkt me Covid-19, por edhe agravime të situatave. Këto janë të pasqyruara në kartelë. Nuk ka asnjë ndërhyrje për ndryshimin e diagnozës ose të ndryshimit të shkakut të vdekjes. Problematikat e krijuara artificialisht krijojnë një tymnajë, një ndarje mes besimit të popullit dhe punës së madhe që bëjnë mjekët”,-tha Kalo.