Bllokimi i anijes iraniane dhe kërcënimet për mbylljen e Ngushticës së Hormuzit, rriten çmimet globale të naftës

Tensionet mes Shteteve të Bashkuara dhe Iranit po reflektohen drejtpërdrejt në tregjet globale të energjisë.

Çmimet e naftës shënuan rritje të fortë mëngjesin e kësaj të hëne në tregjet aziatike, pas deklaratës së presidentit amerikan Donald Trump se SHBA-të kanë ndaluar dhe sekuestruar një anije mallrash me flamur iranian.

Kontratat e naftës Brent u rritën me 4.7%, duke arritur në 94.66 dollarë për fuçi. Ndërkohë, nafta amerikane West Texas Intermediate u rrit me 5.6%, në 88.55 dollarë për fuçi.

Situata u tensionua edhe më shumë pasi Irani deklaroi të shtunën se do të mbyllë sërish Ngushtica e Hormuzit për anijet tregtare, duke paralajmëruar se çdo mjet që i afrohet zonës mund të jetë objektiv sulmi.

Kjo rrugë detare është jetike për ekonominë globale, pasi përmes saj kalon rreth 20% e furnizimit botëror me naftë dhe gaz natyror të lëngshëm.

Tregjet kanë qenë të paqëndrueshme që prej sulmeve të ndërmarra nga SHBA-të dhe Izraeli ndaj Iranit më 28 shkurt, duke shtuar frikën për një përshkallëzim të mëtejshëm në rajon.

Analistët paralajmërojnë se çdo ndërprerje në Ngushticën e Hormuzit mund të ketë pasoja të menjëhershme në çmimet globale të energjisë, duke prekur drejtpërdrejt ekonomitë dhe konsumatorët në mbarë botën.