Korfuzi kërkon që të marrë ujin e Syrit të Kaltër. Lajmi është publikuar në portalin grek “ERT NEWS”, dhe flet për një marrëveshje me vendin tonë për transferimin e burimit të Syrit të kaltër drejt Greqisë. Por Ministria shqiptare e Mjedisit bën të ditur se nuk ka asnjë marrëveshje të tillë dhe as nuk ka pasur diskutime për një projekt të ngjashëm.
“Ministria e Turizmit dhe Mjedisit, nisur nga disa lajme të përhapura në media të ndryshme mbi një propozim/memorandum teknik të supozuar të furnizimit me ujë me transferim burimi nga Syri i Kaltër drejt Korfuzit, sqaron: Nuk ka asnjë marrëveshje të tillë dhe as nuk ka pasur diskutime për një projekt të ngjashëm sipas lajmit të përhapur nga mediat. Pretendimet e ngritura janë të pavërteta. Syri i Kaltër është një pasuri natyrore e Shqipërisë, i cili me vendimet e muajit janar 2022 ka marrë një status më të lartë mbrojtjeje, atë të “Parkut Natyror” me një sipërfaqe të rritur në 293 hektarë, për të mbrojtur më mirë Monumentin e Natyrës me të njëjtin emër, që mban brenda parkut”, mbyllet reagimi i Ministrisë së Turizmit dhe Mjedisit.
Më herët ishte deputetja e PD-së, Ina Zhupa që akuzoi qeverinë për papërgjegjshmëri dhe çmenduri, në një kohë që Saranda, Delvina dhe qytetet e tjera vuajnë nga mungesa e ujit të pijshëm.
