Kreditë e buta, Veliaj thirrje qytetarëve: Koha për të dorëzuar dokumentacionin për fazën e dytë

Kryebashkiaku i Tiranës, Erion Veliaj po e vijon punën edhe nga qelia. Në një postim në Facebook, ai i bën thirrje qytetarëve për kredinë e butë, ku nënvizon se është koha për të dorëzuar dokumentacionin e nevojshëm në fazën e dytë. ”Edhe pse ndodhem i mbyllur në qeli pa akuzë, i dënuar pa gjyq, dua të ftoj çdo qytetar që ka aplikuar gjatë fazës së parë të programit (ku janë shpallur fitues 2237 aplikues), që të sjellin dokumentacionin e nevojshëm në fazën e dytë”,-shkruan Veliaj.

Postimi i plotë

Programi i kredisë së butë për çiftet e reja dhe familjet e pastreha është një nga projektet që kam më përzemër dhe, gjatë këtyre viteve, pasi e rihapëm, kemi ndihmuar shumë qytetarë të Tiranës që të blejnë shtëpinë e tyre me ndihmën e qeverisë dhe Bashkisë së Tiranës.

Edhe pse ndodhem i mbyllur në qeli pa akuzë, i dënuar pa gjyq, dua të ftoj çdo qytetar që ka aplikuar gjatë fazës së parë të programit (ku janë shpallur fitues 2237 aplikues), që të sjellin dokumentacionin e nevojshëm në fazën e dytë.

Deri më tani, në fazën e dytë, shumë aplikues kanë dorëzuar dokumentacionin për kredi të butë, ndërkohë që ka ende kohë deri më 4 mars. Çdokush që është shpallur fitues në Fazën e Parë duhet të dorëzojë dokumentacionin e plotë brenda datës 4 mars (pranë sporteleve të Zyrës së Shërbimeve, me një ndalesë në Rrugën e Kavajës), pasi janë plot 1200 kuota në dispozicion. Nxitoni! Përqafime.