Krerët e disa grupeve politike në Parlamentin Evropian të shtunën i bënë thirrje Izraelit të lejojë rifillimin e menjëhershëm të furnizimeve me ndihmë në Rripin e Gazës.
“Ne bëjmë thirrje për veprime të menjëhershme nga autoritetet izraelite, në bashkëpunim me Kombet e Bashkuara dhe organizatat humanitare, për të siguruar akses të pakufizuar në ndihmën thelbësore humanitare për popullsinë palestineze në Gaza”, thuhej në deklaratë.
Ajo u lëshua nga Manfred Weber i Partisë Popullore Evropiane (EPP) konservatore, Iratxe García i Socialistëve dhe Demokratëve (S&D), Valérie Hayer i Renew Europe, Terry Reintke dhe Bas Eickhout të të Gjelbërve/Aleancës së Lirë Evropiane, dhe Martin Schirdewan i të Majtës.
“Ne bëjmë thirrje për veprime të menjëhershme dhe efektive ndërkombëtare për të lehtësuar krizën e patolerueshme humanitare në Gaza në sfondin e bllokadës së vendosur nga qeveria izraelite që pengon ndihmën humanitare të arrijë popullsinë civile që jeton në kushte çnjerëzore”, vazhdoi deklarata.
Nënshkruesit gjithashtu dënuan “çdo akt politizimi ose militarizimi të ndihmës humanitare”.
Në të njëjtën kohë, ata bënë thirrje për përpjekje diplomatike proaktive nga BE-ja për të arritur një armëpushim të qëndrueshëm dhe për të riafirmuar angazhimin e Parlamentit Evropian për një zgjidhje me dy shtete.
Për më shumë se dy muaj, ushtria izraelite ka ndaluar furnizimet me ndihma të hyjnë në Rripin e Gazës, ku situata humanitare ka arritur përmasa katastrofike.
Ka mungesë ushqimi, uji të pijshëm, ilaçeve dhe gjërave të nevojshme të përditshme, duke i bërë organizatat ndërkombëtare të ndihmës të paralajmërojnë urgjentisht për një uri në rritje./ a.jor.