Kristaq Kume: Venecia të mos keqpërdoret për ligjshmërinë e 30 qershorit

Eksperti zgjedhor dhe ish-kryetari i KQZ-së, Kristaq Kume, deklaron se drafti i Komisionit të Venecias nuk duhet të keqpërdoret nga mazhoranca dhe qeveria për çështjen e standardeve të 30 qershorit. Kume thotë se vlerësimi që Komisioni i Venecias për bojkotin e zgjedhjeve nuk duhet të merret si qëndrim për vlefshmërinë dhe standarde te 30 qershorit.

Në një intervistë për “Ora News”, Kume u shpreh se Komisioni i Venecias nuk ka pasur si mision vlerësimin nëse procesi i 30 qershorit ishte apo jo normal. Ai theksoi se Parlamenti i kërkoi Venecias një shpjegim vetëm për aktet e kreut të shtetit për anulimin e zgjedhjeve dhe dekretimin e zgjedhjeve të reja.

Lidhur me qëndrimin e kreut të shtetit, Kume thotë se Komisioni i Venecias nuk thotë se kreu i shtetit ka shkelur Kushtetutën. “Këtij komisioni ju kërkua që të shprehej për atë se cila ishte mbështetja ligjore e Presidentit kur ai dekretoi datën 30 qershor si datë kur nuk duhet të zhvillohen zgjedhjet. Ajo që bën Komisioni i Venecias është jo vetëm analiza e saktë dhe profesionale e gjithçkaje të realizuara nga institucionet, por dhe çfarë i lejon ligji shqiptar. Venecia thotë se nuk ka qenë kushti i gjendjes së jashtëzakonshme dhe presidenti e ka kapërcyer. Por ka një ndryshim mes shkeljes së Kushtetutës dhe kapërcimit. Nuk ka shkelje ligjore në rastin e Presidentit”,- tha Kume.